طب ليه؟

بقلم د.يس العيوطى استاذ القانون بنيويورك

المقال الاول

فى أمريكا تفتح بقك بحساب !!ولو زاد المعيار يحبس الحمار !! المصرى الامريكى لا يفهم الكلام ده !!حيث دخلت مخه خرافة حرية الراى مالهاش نهاية واعتقد ان الحنجورية فى باب الشعرية مقيدة بسلاسل وكمامات وفى امريكا القانون يحمى المغفلين !!لا يا سيد الكل !!قانون المظاهرات الامريكانى بيقول غير كده بالمرة .انا عارف علشان انا استاذ قانون طبعة امريكانىً.ايوه انا شرقاوي عبيط لكن مش عبيط لدرجةًالبله  والخرف .

فيه مثلث مقيد للحريات فى شوارع امريكا واول قيد عندك ياباشا ساعتين. يعنى ١٢٠ دقيقة بس .ولازم تكون بعيد عن او موسسة عامة بمسافة لا تقل عن ١٠٠ قدم وكمان مفيش فى ايدك لا حجر ولا بندقية ولا كوكتيل مولوتوف معاك ميكرفون اه تقف فوق صندوق اه انما تتشعلق على عواميد النور او الشجر لا

البوليس واقف جاهز النور ازرق واحمر والهراوات جاهزة فى ايد العساكر وكمان انابيب الغاز المسيل للدموع فى انتظار عيونك ولازم يكون فى ايدك الترخيص من ادارةًالشرطة ولازم الشرطة تكون عارفة من جنابك راح تنزل مع الناس بتوعك فى ساعة معينة ومكان معين والطبل ممنوع وازعاج اصحاب الاعمال ممنوع لان الرزق متبوع

ان قلت حرية راى العسكرى راح يقول لك روح لامك وشوف لك شغله قبل ما اجرك على البوكس وارميك فى الزنزانة بعد ما اقول ميرندا

وميرندا مهياش بنت حلوة ده قانون يعلنه العسكرى عليك قبل القبض بيقول :كل اللى يطلع من بقك راح يستخدم ضدك فى المحكمة وان كنت مهاجر ولا فيش معاك جرين كاردتبقى وقعت فى ايد اللى مش حيرحمك امريكا بلد الشغل مش بلد المظاهرات واللى مش عاجبه يروح يشرب من البحر البوليس هنا مش بيضربك على قفاك ده ممنوع انما يرميك على الارض اه مسموح يحط جزمة فوق رقبتك ممكن بحجة انه خايف يكون معاك سلاح يصور المنظر اه ولكن من زاوية تخبى اية تفاصيل يحرمها القانون

الخلاصة ياباشا اللى مسكك هو القانون ارفع ايدك للسما وقول اللهم لا تسلط علينا من لا يخافك ولا يرحمنا

شهادة العسكرى فى المحكمة مسموعة ومحترمة وبتحديد الاطار القانونىً القاضى راح يقول لك عندك محامى والا عايز المحكمة تعين لك محامى على حساب الولاية ان كنت بياع فلافل من طنطا مثلا راح تقول انا فقير يقوم القاضى يبص فىً لسته فيها اسماء محاميين عاديين مسجلين باجر ٢٠٠ دولار فى الساعة وامثال هولاءبيسمًوهم محامى الفقير وهم المحامون اللى مش لا قيين شغل فى الميدان الحر ودفاعه عنك هزيل وفهمه لقوانين الدفاع من نوع مضحك والادهى من كده ان يكون كلامه بالانجليزى غير مفهوم

ولما تخلص المسرحية دى يكون لك سجل بوليس  مبروك مش راح تلاقى حد يشغلك

ارجوك تبعد عنى بكلامك عن حرية الراى دى عبارة ملهاش معنى الا فى حناجر المهاجرين الجهلة وامرك لله  البس الكمامة واوعى تقول

طب ليه ؟